جاري تحميل ... الدنيا فيها أيه ؟

أخبار عاجلة

5

إعلان في أعلي التدوينة

شيكابالامقالات رياضيه

لماذا نعشق شيكابالا؟

في حياتنا دايماً بيبقى في ناس من الممكن أنك تختلف معاهم خصوصاً في إدارتهم لحياتهم و سلوكيتهم بس في نفس الوقت في شىء بيجبرك أن أختلافك معاهم بيبقى خوف عليهم و حب ليهم يعني بيبقى نفسك مع أختلافك ده طول الوقت أنهم يبقوا أحسن و أحسن مش بتبقى عارف هو أنت ليه بتحبهم و بتخاف عليهم و نفسك يبقوا أحسن .

الكلام ده من المنطقى اننا نعيشه مع ناس من اصحابنا او قرايبنا مع ناس بنقابلهم و يقابلونا بنشوفهم دايماً لكن ان الاحاسيس دي تحسها مع حد من الممكن ان انت في الاساس ميكونش بينك و بينه علاقه شخصيه هو ده الغريب و العجيب كمان. طبعاً في اغرب من ان شخص مفيش اى رابط او علاقه شخصيه وجهاً لوجه أنك تتمنى انه يكون احسن. 

أه عادي ده اللي بيسموه الحب اللي بجد وزى ما بيقولوا اللي ربنا بيحبه بيحبب فيه خلقه .واحد من الناس دول هو محمود عبد الرازق(شيكابالا) أو شيكا زى ما جماهير الزمالك بتحب تناديه أو الاباتشي و الفهد الأسمر زى برضه ما الزملكاويه بيلقبوه.


لماذا نعشق شيكابالا

حاله تستحق الدراسه:

شيكابالا حاله تستحق تفكر فيها و تدرسها كويس خصوصاً علاقه جماهير الزمالك بيه .علاقه جمهور الزمالك بشيكا علاقه فريده من نوعها مبنيه في أساسها على حب بدون سبب غير أنها حاجه بتاعة ربنا كده .أيوه حاجه بتاعة ربنا طبعاً أنا مش قصدي هنا تقليل من شيكا طبعاً محدش يختلف على مهارة شيكابالا و أنه من أمهر من أنجبت الملاعب المصريه و من وجهة نظري المحدوده العالميه كمان و ده بدون مبالغه.

بس في لاعيبه كتير عندهم مهاره بس الجمهور مش بيحبهم و يتعاطف معاهم زى شيكابالا .شيكابالا حاله فريده زى ما قولنا تستحق الدراسه بجد .شيكابالا مهما بيكون وحش جوه الملعب بتغضب منه و تثور و تقول عليه كلام ميتقلش بس الماتش اللي بعده لو مشفتش أسمه في التشكيل بتزعل و تضايق و تحس أن في حاجه نقصاك.

لما بتسمع أن الزمالك جاب جول طبعاً بتنبسط أن الزمالك كسبان بس دايماً بتبقى عينك لو شيكا في الملعب بتبص عليه و تبقى نفسك أن هو اللي يكون جايب الجول و بتبقى فرحتك فرحتين لو هو اللي جابه فعلاً مين مننا مش بيحصله كده.

مش كده و بس راجع نفسك كده هتلاقي ان احيان كتير شيكابالا داخل الملعب ممكن يتجاوز او يعمل تصرف غير لائق بتلاقي نفسك بشكل عفوى كده بتأيده في تصرفه ده بدون تفكير حتى لو هو الغلطان .

مين مننا مش بيتمنى كل ماتش للزمالك ان شيكابالا يبقى في التشكيل الأساسي . مين مننا مش بيتمنى كل ماتش و هو بيتابع صفحة نادي الزمالك على الفيس أن شيكابالا ميكنش أحسن لاعب في المباراه . طب مين مننا مكنش بيتمنى أكتر من شيكابالا نفسه أنه ينهي مسيرته في نادي الزمالك و فرح بكده جداً.

مين مننا مكنش دايماً بيتابع أخبار المنتخب و يبص على أختيارت اللعيبه و يشوف شيكا فيهم و لا لأ و بيحزن قوى أنه مش فيهم و يحس أن ده ضيع عليه فرص كبيره و بيتأثر بالموضوع ده شخصياً بشكل كبير جداً.

مين فينا مصدقش حكاية أن شيكابالا كان يتيم و كان في نادي الزمالك بينام في غرفه تحت المدرج علشان معندوش مكان يعيش فيه و قعدنا نحكي الحكايه دي لبعض لحد ما بقت أسطوره و هى حكايه ملهاش أى أساس من الصحه.

حاله فريده من عشق الأباتشي:

أنا عن نفسي بفسر حالة الحب الفريده من نوعها دي و اللي خلت من شيكابالا معشوق الزملكاويه بلا منازع عبر كل العصور وده بدون مبالغه . اه في لاعبين كتير جمهور الزمالك حبهم على مدار تاريخه الكبير بس برضوا من وجهة نظري مخدوش مكانة شيكابالا.
شيكابالا طبيعي تلقائي في تصرفاته شبهنا و شبه الناس الطيبين طبعاً و أيه العجيب في ده أصله من أسوان بلد الناس الطيبين . و علشان تصرفاته و انفعالاته تلقائيه و بتطلع من القلب بتوصل لقلبك علطول و بتحبها و بتقدرها و بتلمسك حتى لو أختلفت معاها.

شيكابالا جوه الملعب و براه لاعب محبوب من كل زملائه بشكل كبير جداً مش بس في لعبة كرة القدم لا شوف كل الالعاب التانيه و اللي دايماً شيكابالا بيصر أنه يحضر المباريات الخاصه بيها و كل اللاعبين فيها بيحبوه و يقدروه بشكل يفوق الوصف شوف مثلاً علاقته ب أحمد الأحمر أسطورة كرة اليد ده كله بيرجع لطيبة شيكا و لأنه صاحب صاحبه طبعاً أصله برج الحوت .

شيكابالا زى كتير مننا شخصيته البسيطه و طيبته للأسف مقدرتش تشيل موهبته و كتير مننا كده شخصيتنا البسيطه و طيبتنا مش بتقدر تشيل مواهب كتير عندنا فتلاقي في ناس تملك ربع أمكانيات شيكا بس هما وصلوا لحاجات كتير هو موصلهاش .

شيكابالا من الأخر شخص لازم تحبه مهما أختلفت معاه مينفعش غير أنك تحبه .كفايه بس أنك لو راجعت تاريخه الطويل و الكبير مش هتلاقي أنه تسبب في أزية أى شخص أو زميل ليه . للأسف شيكابالا في كل مره مكنش بيأزي غير نفسه .

وفي الختام:

شيكابالا ممكن يكون فقد حاجات كتير و اللقاب كتير كان من السهل على لاعب في موهبته أنه ياخدها .بس أعتقد أنه حصل على حاجه مفيش أى لاعب غيره في تاريخ الكره المصريه حصل عليها و هى حب الجمهور و عشقه لشيكا و اللي هيفضل من أعظم و امهر اللاعبين اللي مروا على تاريخ نادي الزمالك و الكره المصريه بوجه عام.

حب الجمهور لشيكابالا بيختلف عن حبهم لأى لاعب تاني لأنه حب حقيقي و طبيعي مش صناعي صنعه الأعلام و مؤسساته حب الجمهور لشيكا حب نابع من أحساس بموهبه عظيمه أتظلمت كتير حتى و لو كانت في  بعض الأحيان ظلمت نفسها بأيديها .


 


***********************

>
>

***********************

هناك تعليق واحد:

إعلان في أسفل التدوينة

إتصل بنا

نموذج الاتصال

الاسم

بريد إلكتروني *

رسالة *